Ali və orta ixtisas təhsili müəssisələrinə qəbul qaydaları açıqlandı

Azərbaycanın ali təhsil müəssisələri və tam orta təhsil bazasında orta ixtisas təhsili müəssisələrinə tələbə qəbulu qaydaları və qəbul imtahanı proqramları açıqlanıb. www.zerdab.com saytının məlumatına görə, Tələbə Qəbulu üzrə Dövlət Komissiyasının sədri Məleykə Abbaszadə keçirdiyi mətbuat konfransında deyib ki, Azərbaycanın ali təhsil müəssisələri və tam orta təhsil bazasında orta ixtisas təhsili müəssisələrinə tələbə qəbulu qaydaları və qəbul imtahanı proqramları “Abituriyent” jurnalının 1-ci sayında dərc olunub.

Onun sözlərinə görə, ali və orta ixtisas təhsili müəssisələrinə ərizə qəbulu internet vasitəsilə aparılacaq. Bu il də bütün qruplarda iki imtahan fənninin hər biri üzrə təqdim edilən 25 test tapşırığından 5-i açıq tipli olacaq. Belə ki, I ixtisas qrupunda – riyaziyyat və fizika, II ixtisas qrupunda riyaziyyat və coğrafiya, III ixtisas qrupunda riyaziyyat və tarix, IV ixtisas qrupunda-riyaziyyat və kimya fənlərindən açıq tipli test tapşırıqlarından istifadə ediləcək.

Bu ilin qəbul qaydaları Ədliyyə Nazirliyində təsdiq edilib və ötən ilki kimidir. Qaydalarda hüquqi cəhətdən heç bir dəyişiklik edilməyib.

“Mən valideynlərə və abituriyentlərə məsləhət görürəm ki, qəbul proqramlarını alıb oxusunlar. Valideynlər uşaqlarını hazırlaşdıran müəllimlərə inanırlar, qəbul proqramları ilə tanış olmurlar. Ancaq bu proqramlarla tanış olmaq lazımdır. Bununla onlar öyrənə bilərlər ki, nəyi yaxşı bilirlər, nəyi təkrar etmək lazımdır. Yarım il ərzində bunu etmək mümkündür”,-TQDK sədri deyib.

O deyib ki, “Abituriyent” jurnalının I sayında test nümunələri də verilib. Həmin nümunələr builki qəbul proqramlarına uyğundur.

Abbaszadə deyib ki, builki imtahanların çətinlik dərəcəsi artıq bilinir. İndidən ekspertlər bu testləri müzakirə edə bilərlər. Bunun üçün onların kifayət qədər vaxtları var.

“Yalnız imtahan bitdikdən və nəticələr elan edildikdən sonra müəyyən fikirlər səslənir ki, suallar çətin idi, proqramdan kənar idi. Bax, bu suallar yarım il əvvəl elan edilib. Eksperlərin təklifləri əsasında model testlərə dəyişiklik də edlə bilər” – Abbaszadə deyib.

Ali məktəblərə qəbul imtahanlarının ilkin vaxtı açıqlandı 

 Tələbə Qəbulu üzrə Dövlət Komissiyası (TQDK) 2013/2014-cü tədris ili üçün Azərbaycanın ali təhsil müəssisələrinə qəbul imtahanlarının ilkin vaxtını açıqlayıb. Tələbə Qəbulu üzrə Dövlət Komissiyasının sədri Məleykə Abbaszadə deyib ki, ilk imtahanın III ixtisas qrupu üzrə keçirilməsi nəzərdə tutulur. Bu qrup üzrə imtahan iyulun 14-də, I ixtisas qrupu üzrə iyulun 21-də, IV ixtisas qrupu üzrə iyulun 28-də, II ixtisas qrupu üzrə avqustun 3-də keçiriləcək.

Abbaszadə deyib ki, bu tarixlər layihə şəklində müəyyənləşdirilib və imtahanın təşkilində iştirak edən müvafiq orqanlarla birgə dəqiqləşdirilib.
“Bu layihədə hansısa dəyişiklik ola bilər. Bu dəyişiklik hava şəraiti və digər şəraitlərlə əlaqədar ola bilər. Ötən il qəbul imtahanlarını elan etmişdik, ancaq buraxılış imtahanları TQDK tərəfindən keçirildiyi üçün qəbul imtahanlarının vaxtı dəyişdirildi”, – Abbaszadə əlavə edib.

Abbaszadə deyib ki, ali təhsil müəssisələrinin bakalavriat səviyyəsi üzrə sınaq imtahanları aprelin 7-dən mayın 26-dək keçiriləcək. Bu müddətdə ümumilikdə 7 sınaq imtahanı keçiriləcək, onların 3-ü təkrar olacaq.

TQDK sədri deyib ki, ali təhsil müəssisələrinə ərizə qəbulu aprelin 9-dan başlayacaq və mayın 15-dək davam edəcək. Baalavrlar ərizələrini aprelin 15-dən mayın 17-dək təsdiq etdirə bilərlər. Ali və orta ixtisas təhsili müəssisələrinə (tam orta təhsil bazasında) qabiliyyət imtahanı iştirakçılarının qeydiyyatı 1-20 mayda aparılacaq. Rus bölməsi üzrə Azərbaycan dili imtahanının I mərhələsi mayın 19-da Bakıda və bölgə mərkəzlərində keçiriləcək. Mayın 8-i rus bölməsi üzrə Azəbaycan dili imtahanının I mərhələsində iştirak etmək istəyən abituriyentlər üçün ərizə təsdiqinin son günü olacaq.

Rus bölməsi üzrə Azərbaycan dili imtahanının II mərhələsi iyunun 23-də olacaq və yalnız Bakıda keçiriləcək.

Hərbi liseylərə ərizə qəbulu 15 aprel-25 iyun tarixlərində aparılacaq. Magistraturaya sınaq imtahanı 17 fevral, magistraturanın I mərhələsi üzrə qəbul imtahanı 3 mart, II mərhələsi üzrə qəbul imtahanı 23 iyunda olacaq. Magistraturaya proqram seçimi 3-11 iyun, magistraturaya ixtisaslaşma seçimi 26-28 iyun tarixlərində, ali məktəblərin müxtəlif istiqamətləri üzrə qabiliyyət imtahanları isə iyulun 18-dən avqustun 12-dək olacaq.

TQDK sədri bildirib ki, ali təhsil müəssisələrinə ixtisas seçimi 6-15 avqustda, bakalavriat səviyyəsi üzrə ali təhsil müəssisələrinə əlavə yerləşdirmə və orta ixtisas təhsili müəssisələrinə (tam orta təhsil bazasında) müsabiqə və yerləşdirilmə 18-22 avqustda keçiriləcək.

Orta ixtisas təhsili müəssisələrinə (ümumi orta təhsil bazasında) ərizə qəbulu 17 iyul-15 avqustda, orta ixtisas təhsili müəssisələrinə (ümumi orta təhsil bazasında) qabiliyyət imtahanı 5-13 avqustda, orta ixtisas təhsili müəssisələrinə (ümumi orta təhsil bazasında) qəbul imtahanı isə 25 avqustda keçiriləcək. Orta ixtisas müəssisələrinin boş qalan plan yerlərinə ixtisas seçimi 9-12 sentyabrda baş tutacaq.

Rezidenturaya sınaq imtahanı 17-18 avqustda, sənəd qəbulu 14-23 avqust, qəbul imtahanı 9-10 sentyabrda keçiriləcək.

www.zerdab.com