Ötən gecə Zərdabda ağır yol qəzası baş verib.
DİN-in Mətbuat Xidmətinin Şirvan regional qrupundan bildirilib ki, hadisə saat 23 radələrində Kürdəmir – Zərdab yolunda baş verib. Ağcəbədi rayon sakini Niyaməddin Quliyev idarə etdiyi “VGV U75 Plus” markalı avtomobillə hərəkətdə olan zaman idarəetməni itirib. Nəticədə avtomobil yoldan çıxaraq aşıb. Qəza zamanı nəqliyyat vasitəsində olan 2 nəfər hadisə yerində, sürücünün digər qızı isə xəstəxanada ölüb. Daha 6 nəfər sərnişin isə müxtəlif dərəcəli bədən xəsarətləri alıblar.
Faktla bağlı Zərdab RPŞ-də araşdırmalar aparılır.
Qafqazinfonun əldə etdiyi məlumata görə, qəzaya düşən avtomobildəki 9 nəfər bir ailənin üzvü və yaxın qohumlar olub. Hadisə nəticəsində ölənlərdən biri sürücü N. Quliyevin 13 yaşlı qızı, digəri isə yaxın qohumu olan 4 yaşlı qızdır.
Hadisə nəticəsində ağır xəsarətlər alan sürücü N. Quliyevin digər qızı isə səhər saatlarında xəstəxanada vəfat edib.
