“Bura Zərdab rayonunun Qoruqbağı kəndidir. Milyonlar xərclənib, yol çəkilib. Ancaq Ucar-Zərdab-Ağcabədi yolunun kənarına çəkilən işıq dirəkləri heç 1 ay işləmədi”. Bunu Zerdab.com saytına müraciətində Qoruqbağı kənd sakini Vaqif Məmmədov bildirib.
“Bir az külək əsən kimi işıq dirəkləri üzərindəki işıqlandırma sistemi qırılıb yola töküldü, çilik-çilik oldu. Qaranlıq olan fotoda gördüyünüz yolun gecə görüntüsüdür. Gecələr bu yolda göz-gözü görmür, hər an piyadaların vurulması qəzası, hər an faciə baş verə bilər. Milyonlar xərclənən yolda işıqlandırma dirəyi var, işıqlandırma isə heç 1 ay davam etmədi”,-deyə Vaqif Məmmədov vurğulayıb.
Qoruqbağı kənd sakini Vaqif Məmmədov deyir ki, Kür çayı üzərindəki körpüdə işıqlandırma dirəkləri işləyir, gecələr də çox gözəl görünür: “Amma kəndin içərisindəki işıqlandırma sistemi çox pis quraşdırılıb, ona görə qırılıb tökülüb yerə. Hara müraciət ediriksə, baxan yoxdur. Odur ki, məsələni ictimailəşdirmək üçün Zerdab.com-a saytına müraciət etmək qərarına gəlmişik”.
Vaqif Məmmədovun göndərdiyi fotoları təqdim edirik.
Zerdab.com
