Seyfi Həsənovu rayonumuzda tanımayan az adam tapılar desək, yəqin ki, yanılmarıq. Birinci Qarabağ müharibəsi veteranı, Azərbaycan Vətən Müharibəsi Veteranları İctimai Birliyinin Zərdab rayon şöbəsinin sədridir.
Seyfi Həsənov 1958-ci ildə Ucar rayonunun Lək kəndində anadan olub.
Orta təhsilini Ucar rayonunda alıb.
1977-1979-cu illərdə Sovet ordusunda xidmət edib. Uzun illər Rusiyada və Ukraynanın Xarkov şəhərində yaşayıb.
1989-cu ildə Qarabağ münaqişəsi alovlanarkən könüllü olaraq Azərbaycana gəlib.
Məlum olduğu kimi, həmin dövrdə döyüşlərdə iştirak etmək üçün könüllü dəstələr yaradılırdı.
Seyfi Həsənov da həmin könüllülərdən ibarət dəstələrdən birinə yazılır və döyüşlərə yollanır.
Seyfi Həsənov 1990-cı ilin əvvəllərində keçmiş Xanlar rayonunun (indiki Göygöl) Çaykənd, Azad və Kamo kəndlərinin düşməndən azad edilməsində yaxından iştirak edir.
1991-ci ildə qanunsuz erməni hərbi birləşmələri Erkəc, Mənəşid və Buzluq kəndləri istiqamətindən Goranboy rayonunun Todan kəndinə hücum edirlər. Düşmənlərə qarşı döyüşlərdə Seyfi Həsənov da iştirak edir. Onun döyüş yoldaşlarından biri də Milli Qəhrəman Nofəl Quliyev idi. Həmin döyüşlərin birində Nofəl Quliyev qəhrəmancasına şəhid olur.
1992-ci ildən isə Seyfi Həsənovun döyüş istiqaməti dəyişir. Belə ki, o, Tərtər istiqamətinə göndərilir. Bir neçə uğurlu əməliyyatlarda iştirak edir, düşmən xeyli sayda itki verərək geri çəkilir. O, Marquşavanda da döyüşlərdə iştirak edir.
Sonradan Seyfi Həsənov Daxili İşlər Nazirliyinin təqdimatı ilə Xüsusi Təyinatlı Polis dəstəsinə, daha sonra isə Ucar rayon Polis Şöbəsinin Post Patrul Xidməti rotasına komandir təyin edilir. Bir müddət sonra isə Qarabağ döyüşlərində fəal iştirakına görə ona zabit rütbəsi verilir.
Lakin Seyfi Həsənov yenidən ordu sıralarına qayıdır. O, atəşkəs elan olunana qədər, yəni 1994-cü ilədək döyüşlərdə iştirak etdir. Seyfi Həsənovun döyüş yolu Şuşa, Laçın, Füzuli və Cəbrayıl istiqamətindən də keçib.
Seyfi Həsənov “Müharibə veteranı”, “Milli Ordunun yaranmasının 100 illiyi”, “Cəmşid Naxçıvanski adına” medalları ilə təltif edilib.
Zerdab.com
