Dünən Prezident İlham Əliyev “Azərbaycan Respublikasının regionlarında uşaq bağçalarının tikintisi ilə bağlı tədbirlər haqqında” sərəncam imzalayıb. Zerdab.com saytı xəbər verir ki, sənədə əsasən, 15 şəhər və rayonda 1230 yerlik 15 uşaq bağçası tikiləcək.
Sərəncamla Zərdab rayonunun Gəlmə kəndində 60 yerlik körpələr evi-uşaq bağçası tikiləcək.
Qeyd edək ki, Gəlmə kəndində körpələr evi-uşaq bağçası üçün yeni binanın tikilməsinə ehtiyac olması məsələsi Zərdab rayonundan millət vəkili Jalə Əliyeva tərəfindən bir neçə dəfə müxtəlif dövlət tədbirlərində gündəmə gətirilib.
Sonuncu dəfə deputat Jalə Əliyeva Milli Məclisin 2018-ci ilin dövlət büdcəsi layihəsinin müzakirələrinə həsr edilmiş iclasında çıxışı zamanı bu məsələni bir daha gündəmə gətirmişdi.
Həmin çıxışında Jalə Əliyeva Gəlmə kəndində körpələr evi-uşaq bağçası üçün yeni binanın tikilməsinə ehtiyac olduğunu dövlət və hökumət rəsmilərinin diqqətinə çatdırmışdı.
Sonda qeyd edək ki, Prezidentin sərəncamı ilə Gəlmə kəndində bağçanın tikintisinə 963 min manat vəsait ayrılıb.
(Millət vəkilimizin Milli Məclisin 2018-ci ilin dövlət büdcəsi layihəsinin müzakirələrinə həsr edilmiş iclasında çıxışının tam mətni ilə bu linkdən tanış olmaq olar: http://www.zerdab.com/?p=25466)
