Kürdəmir rayonunda piyadanı vurub öldürərək hadisə yerindən qaçan sürücü saxlanılıb.
Zerdab.com saytı xəbər verir ki, Daxili İşlər Nazirliyinin Dövlət Yol Polisi İdarəsi və Zərdab Rayon Yol Polisi Bölməsi əməkdaşlarının birgə keçirdikləri tədbirlər nəticəsində hadisənin Qaradağ rayon sakini Elgün Zeynalovun idarə etdiyi “KamAZ” markalı yük maşını ilə törədildiyi məlum olub.
Respublika Baş Prokurorluğu Kürdəmirdə ölümlə nəticələnən yol-nəqliyyat hadisəsi barədə məlumat yayıb.
Baş Prokurorluğun mətbuat xidmətindən daxil olan məlumatda bildirilir ki, dekabrın 27-də saat 18 radələrində Bakı-Qazax-Gürcüstan sərhədi yolunun Kürdəmir rayonunun Xırdapay kəndi ərazisindən keçən hissəsində naməlum avtomobilin sürücüsünün yol hərəkəti və nəqliyyat vasitələrinin istismarı qaydalarını pozaraq 1964-cü il təvəllüdlü İsgəndərov Nadir Arif oğlunu vurub hadisə yerindən qaçması və sonuncunun aldığı xəsarətlərdən vəfat etməsi faktına görə Daxili İşlər Nazirliyinin Baş İstintaq və Təhqiqat İdarəsinin Yol Nəqliyyat Hadisələrinə dair işlər üzrə İstintaq və Təhqiqat şöbəsində Cinayət Məcəlləsinin 263.2 (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələri ilə cinayət işi başlanmış, müvafiq ekspertizalar təyin edilib və digər zəruri istintaq və əməliyyat-axtarış tədbirləri həyata keçirilib.
Aparılmış tədbirlər nəticəsində yol nəqliyyat hadisəsinin “KamAZ” markalı 99 KJ 822 dövlət qeydiyyat nişanlı avtomobili idarə edən 1998-ci il təvəllüdlü, Bakı şəhər sakini Zeynalov Elgün Rövşən oğlu tərəfindən törədilməsində əsaslı şübhələr olduğundan o, şübhəli şəxs qismində tutularaq istintaqa cəlb edilib.
Hazırda cinayət işi üzrə istintaq tədbirləri davam etdirilir.
