Yeni Azərbaycan Partiyasının yaranmasının 25 illik yubileyi münasibətilə YAP Zərdab rayon təşkilatı tərəfindən yubiley tədbiri təşkil edilib. YAP Zərdab rayon təşkilatından Zerdab.com saytına verilən məlumata görə, tədbirdə YAP Zərdab rayon təşkilatı İdarə heyətinin üzvü, Rayon İcra Hakimiyyətinin başçısı Lütvəli Babayev, rayon təşkilatının Şura üzvləri, ərazi ilk partiya təşkilatlarının sədrləri, gənclər, partiya veteranları, YAP Zərdab rayon təşkilatının yaradıcıları-təsis konfransının nümayəndələri iştirak edibər.
Əvvəlcə iştirakçılar ümummilli lider Heydər Əliyevin büstü önünə gül dəstələri düzüb, Ulu Öndərin əziz xatirəsinə ehtiramlarını ifadə ediblər.
Sonra Zərdab rayon Heydər Əliyev Mərkəzində davam edən tədbirdə Azərbaycanın dövlət himni səslənib və YAP-ın tarixinə, Ümummilli lider Heydər Əliyevin və partiyanın Sədri, Prezident İlham Əliyevin fəaliyyətinə həsr olunmuş videoçarx nümayiş etdirilib və şəhər 1 saylı məktəb liseyin şagirdlərinin ifasında Ulu öndərin partiya və dövlətçilik fəaliyyətinə həsr olunmuş kompazisiya səsləndirilib.
Tədbiri giriş sözü ilə açan YAP Zərdab rayon təşkilatının sədri Pərvin Mahmudova Azərbaycan dövlətçiliyinin inkişafında YAP-ın xidmətlərindən danışıb. O qeyd edib ki, Ulu öndər Heydər Əliyev öz siyasi dühası ilə Azərbaycanın müasir simasını müəyyənləşdirib və xalqımızın taleyində silinməz izlər qoyub.
Sonra Zərdab rayon İcra Hakimiyyətinin başçısı, YAP Zərdab rayon təşkilatı İdarə Heyətinin üzvü Lütvəli Babayev yubiley münasibəti ilə tədbir iştirakçılarını təbrik edib.
Lütvəli Babayev bildirib ki, YAP-ın yaranması müstəqillik tariximizdə yeni mərhələnin əsasını qoyub: “Zamanın tələbi ilə yaranmış, dünənin, bu günün və sabahın partiyası olan YAP 25 il ərzində şərəfli tarixi yol keçərək, müstəqil dövlətimizin möhkəmlənməsində xüsusi rol oynayıb. Bu yubiley münasibətilə bütün partiya üzvlərini, o cümlədən YAP Zərdab rayon təşkilatının hər bir üzvünü, rayonumuzun bütün əhalisini təbrik edirəm”.
L. Babayev həmçinin Zərdab rayonunda həyata keçirilən geniş quruculuq işləri haqqında da məlumat verib.
Tədbirdə həmçinin YAP Zərdab rayon təşkilatının yaradıcılarından Tahir Qasımov, İsrəfil Həmidov, Etibar Hacıyev, YAP Zərdab rayon təşkilatı Gənclər Birliyinin sədri Ələkbər Kərimov, YAP Zərdab rayon təşkilatı Qadınlar Şurasının sədr müavini Nailə Əliyeva, “Əməkdar müəllim”, partiya fəalı, Zərdab şəhər 1 saylı məktəb liseyin direktor müavini Şəhla Eminova və başqaları çıxış edərək ötən 25 ildə əldə edilən uğurlar barədə danışıblar.
Sonra ictimai-siyasi aktivliyi ilə seçilən bir qrup partiya üzvünə Fəxri fərmanlar və hədiyyələr, YAP sıralarına yeni qoşulan şəxslərə üzvlük vəsiqələri təqdim olunub.
