Zərdab rayonunun Məlikli kənd sakini İsrəfilov Nurlan İsabala oğlu ağır vəziyyətdə Bakıda Tibb Universitetinin Tədris-Cərrahiyyə Klinikasına yerləşdirilib. Bu barədə Zerdab.com saytına onun yaxınları məlumat veriblər. Həmyerlimiz, jurnalist Nicat İntiqam da “facebook” sosial şəbəkəsində bu mövzuda status paylaşıb. Həmin statusu oxucularımıza təqdim edirik: “Dost-tanış soruşur son vaxtlar niyə belə gərginsən, əsəbisən. Axı necə olmayım, gözüm görə-görə 35 yaşında bir insan can verir, amma əlimizdən heç nə gəlmir. Daha doğrusu, əlimizdən gələnlər bir işə yaramır. İsrəfilov Nurlan (18.12.1980-ci il təvəllüd) İsabala oğlu qaraciyər serrozundan şəkildə gördüyünüz bu ünvanda yatır, təkcə əməliyyatı üçün 50 min manat lazımdır. Həkimlər bildirirlər ki, damarı da genişləndiyindən hər an qanaxmadan dünyasını dəyişə bilər. Lakin əməliyyat baha olduğundan ailəsi qalıb çıxılmaz durumda. Zərdab rayonunun Məlikli kəndindən olan ailəsi qapı-qapı düşüb pul yığır. Nurlan isə xəstəxananın çarpayısında uzanıb tavana baxa-baxa nə düşünür, Allah bilir. İndi gəlirəm yanından, qəmgin-qəmgin oturub üzümə baxırdı. Atasına indi zəng vurdum (051 416 01 65), həyəcandan danışa bilmədi. Allahım, sən onlara bağlı bir qapı aç”.
Zerdab.com
