Zərdab rayonunun Məmmədqasımlı kənd sakini, Böyük Vətən Müharibəsinin üç dəfə “Şöhrət” ordeni ilə təltif edilmiş qəhrəmanı Muradalı Heydərov Prezident İlham Əliyevə məktub ünvanlayıb. Zerdab.com saytının məlumatına görə, M. Heydərov məktubunda ona “Naz-Lifan” markalı minik avtomobili hədiyyə etdiyinə görə, dövlət başçına təşəkkürünü çatdırıb. Məktubun mətnini oxucuların diqqətinə təqdim edirik:
“Möhtərəm Prezident!
Sizin doğma xalqımızın, o cümlədən biz veteranların rifahı naminə gördüyünüz çox böyük və əzəmətli işlər hər birimizi ürəkdən sevindirir, qəlbimizi iftixar hissi ilə doldurur. Fəxr edirik ki, bu gün Azərbaycana dünya siyasətinin nəhəngi Heydər Əliyev kimi dahi şəxsiyyətin yüksək istedadlı, ləyaqətli və qətiyyətli övladı İlham Əliyev rəhbərlik edir.
Mənim Böyük Vətən Müharibəsindəki qəhrəmanlığımı, üç dəfə “Şöhrət” ordeni ilə təltif olunmağımı və birinci qrup əlil olduğumu nəzərə alaraq mənə “Naz-Lifan” markalı minik avtomobili hədiyyə etdiyinizə görə Sizə ürəkdən və sonsuz təşəkkür edirəm. İnanıram ki, Siz ulu öndərimiz Heydər Əliyevin əsasını qoyduğu strategiyanı uğurla davam etdirəcək, xalqımızı və dövlətimizi gözəl günlərə qovuşduracaqsınız. Çətin və şərəfli fəaliyyətinizdə Sizə böyük uğurlar və möhkəm cansağlığı arzulayırıq.
Dərin hörmətlə və sonsuz ehtiramla,
Heydərov Muradalı, 93 yaşlı Prezident təqaüdçüsü, Böyük Vətən Müharibəsinin üç dəfə “Şöhrət” ordeni ilə təltif edilmiş qəhrəmanı.
Azərbaycan Respublikası, Zərdab rayonu, Məmmədqasımlı kəndi”.
Zerdab.com
