Oktyabrın 16-da Xarkovda, Petrovski 7 ünvanında Ukraynanın bu böyük regionunun vilayət mərkəzində Azərbaycan Respublikasının fəxri konsulluğunun açılışı mərasimi olub. Bu barədə Zerdab.com saytına Azərbaycanın Xarkovdakı fəxri konsulluğundan məlumat verilib. Bildirilib ki, diplomatik müəssisənin açılışı mərasimində Azərbaycan tərəfinin, Ukrayna Xarici İşlər Nazirliyinin nümayəndələri, diplomatik korpusun üzvləri, konsul dairəsinin əhatə etdiyi şəhər və vilayətlərin rəhbərləri iştirak ediblər. Qeyd edək ki, konsulluq dairəsinə Xarkov vilayətindən başqa, Dnepropetrovsk, Zaporojye, Poltava, Sumı və Çerniqov vilayətləri də daxildir.
Azərbaycanın Ukraynadakı səfiri Eynulla Mədətli tədbirdəki çıxışında xüsusi vurğulayıb ki, Azərbaycan Prezidenti İlham Əliyev Ukrayna ilə qarşılıqlı münasibətlərin genişlənməsinə və dərinləşməsinə böyük əhəmiyyət verir.
Diplomat deyib: “Əminəm ki, Xarkovda fəxri konsulluğun olması istər rəsmi səviyyədə, istərsə də biznes sahəsində əlaqələrimizi xeyli canlandıracaq. Düşünürəm ki, bu, ticarət, iqtisadiyyat, elm, mədəniyyət və təhsil sahəsində münasibətlər baxımından xalqlarımızı bir-birinə daha da yaxınlaşdırmaq üçün atılan mühüm addım olacaq”.
Azərbaycanın Xarkovdakı fəxri konsulu Əfqan Salmanov bildirib ki, o, öz vəzifəsini Azərbaycan diasporuna dəstək olmaqda və iki dost xalq arasında çoxtərəfli münasibətlər yaratmaqda görür.
Fəxri konsul deyib: “Biz qarşılıqlı investisiyaların həcminin artırılmasına, ticarətin gücləndirilməsinə, Azərbaycanın və Ukraynanın inkişafı üçün əlverişli işgüzar şərait yaradılmasına çox maraq göstəririk. Biz turizm, təhsil, idman sahəsində də əməkdaşlığı inkişaf etdirəcəyik”.
Tədbirdə bizim tərəfdən xüsusi tapşırıqlar üzrə səfir Gündüz Cəfərov, Azərbaycanın Ukraynadakı səfirliyinin əməkdaşları, Azərbaycan Daxili İşlər Nazirliyinin Kiyevdəki nümayəndəsi, polis polkovniki Şahin Qocayev, Azərbaycan Respublikası Dövlət Neft Şirkətinin Ukraynadakı nümayəndəliyi rəhbərinin müavini Həzi Aslanov, Ukraynanın Xalq rəssamı Seyfəddin Qurbanov, Azərbaycan diasporunun fəalları və üzvləri iştirak ediblər.
Xatırladırıq ki, Əfqan Fəqan oğlu Salmanov 1967-ci il aprelin 20-də Zərdab şəhərində anadan olub. Xarkovda iki ali məktəb bitirib, iqtisadçı və mühəndis-iqtisadçı ixtisaslarına yiyələnib. 2003-cü ildən Sumı Vilayət Sovetinin deputatıdır, hazırda aqrar-sənaye kompleksi məsələləri üzrə daimi deputat komissiyasının üzvüdür. 2008-ci ildən “UK.AZ.Dostluq” MMC-nin həmtəsisçisidir.
Sevinc Vaqifqızı
FFəxrimizdir! Qoy Azərbaycan oğullarının səsi dünyanın
ən yüksək kürsülərindən cəlsin.Azərbaucanımızı tanıda biləcək, sevdirə biləcək hər kəsi alqışlayıram—–Səadət SEYİDOVA
Təbrik edirəm.Allah sizi qorusun.
Comments are closed.