YAŞASAYDI BU AY 35 YAŞI TAMAM OLACAQDI…
KƏNDƏBİL ŞƏHİDLƏRİNİN ƏN KİÇİYİ : VÜSAL NAMİZƏD OĞLU MUSAYEV
Həyat üçün doğulmuşuq ,
Vətən üçün ölməliyik! – Ülvi Bünyadzadə .
…Həyat bizə müftə verilmir. Biz onu ləyaqətlə yaşayıb ölümün pəncəsindən əbədiyyətə aparmaq üçün böyük mübarizələrdən keçməli oluruq. Hələ 1988-ci ildən Ermənistanın Azərbaycan torpaqlarının bütövlüyünə qarşı həyata keçirməyə başladığı ədalətsiz müharibəsi özünü Vətən uğrunda fəda etməyə hazır olan oğullarımızı çox sarsıtmışdı. Bir qarış torpağımızı belə mənfur qonşuya vermək istəməyən qeyrətli oğullarımız “Təki Vətən yaşasın” deyə tarixi düşmənlərimizlə vuruşmaqdan ötrü müharibə zonasına yollanırdılar. Azərbaycanın igid övladları doğma Qarabağımızı düşmənə təslim etməmək üçün ölkəmizin bütün bölgələrindən könüllü olaraq cəbhəyə “axışırdılar”. Lakin rusların ermənilərə havadarlığı nəticəsində 1990-cı illərin əvvəllərində Ermənistan Azərbaycanın bir çox yaşayış məntəqələrini işğal etdi və 1 milyondan çox insan öz yurd yuvalarından didərgin düşdü. Müharibə aparan Azərbaycan və Ermənistan tərəfləri ilə aparılan danışıqların nəticəsi olaraq 1994-cü il mayın 8-də tərəflər arasında atəşkəsin əldə edilməsi barədə imzalanmış “Bişkek protokolu” mayın 12-də qüvvəyə mindi və həmin gün cəbhə xəttində aktiv hərbi əməliyyatlar dayandırıldı. Buna baxmayaraq düşmən atəşkəsi pozaraq bizim hərbi hissələrimizə və əsgərlərimizə zərbələr endirməkdə davam edirdi. Vüsal Musayev belə bir vaxtda – 1997–ci ilin payızında əsgəri xidmətini yerinə yetirmək üçün hərbi hissəyə getdi. Doğulduğu Zərdab rayonunun Kəndəbil kəndi Vüsalı əsl igid kimi yetişdirə bilmişdi. Gənc oğlan 18 yaşına çatanda artıq kəndlərindən 5 nəfər şəhid olmuşdu:
1. Çingiz Qasımov (1973-1992 ),
2. Elçin Hacıyev (1970-1993),
3. Namiq Qasımov (1973-1993),
4. Vüqar Abdullayev (1973-1993),
5. Dəyanət İsmayılov (1975-1994).
Vüsal Musayev isə 1979-cu ilin iyun ayında Kəndəbildə doğulmuşdu. 1998-ci ilin 10 mayında şəhidlik zirvəsinə yetişən Vüsal Gəndəbil şəhidlərinin yaşca ən kiçiyi idi. Vüsal elə ailədə də sonbeşik idi: Nəzakət, Məhruzə, Emin və Vüsal. Nəzakət Məhərrəmova ailə qurması ilə əlaqədar hazırda Zərdabda yaşayır, Zərdab rayon mədəniyyət evi nəzdində fəaliyyət göstərən Veteranlar klubunda metodist vəzifəsində çalışır. Vüsalın böyük qardaşı Emin hərbi xidmətini döyüş bölgəsində – Qarabağda yerinə yetirib doğma kəndlərinə qayıtmışdı. Amma Vüsal hərbi xidmətini Qarabağda yerinə yetirib doğma kəndə, öz ailəsinə qayıda bilmədi. Atası Namizəd Musayev Vüsalın yoxluğuna dözənmədi. 2009-cu ildə vəfat etdi. Onu da şəhid oğlu Vüsalın uyuduğu Kəndəbil qəbirstanlığında dəfn etdilər. Böyük bacısı Nəzakət xanım deyir: “Ailəmizin sonbeşiyi Vüsal kəndimizdəki orta məktəbi bitirmişdi. Böyük bacı və qardaşlarımızın hər biri müxtəlif məktəblərdə təhsil aldıqları üçün Vüsal valideyinlərimizin yanında qalırdı. Rəhmətlik atamın və anam Südabə xanımın qayğısını çəkirdi. Ailəcanlı və qohumsevən idi. Kəndlilərimizlə hər dəfə qarşılaşanda onlarla elə səmimi davranırdı ki, sanki ən əziz insanını görürdü. Bəlkə elə buna görə Vüsal Füzuli rayonunun Alxanlı kəndində hərbi xidmətini yerinə yetirərkən şəhid olub kəndimizə gətiriləndə bütün Kəndəbil camaatı göz yaşı töküb əzizini itirmiş kimi ağladı. Vüsalın nəşini hərbi hissədən evimizə gətirən komandiri və əsgər yoldaşları bizə onun şəhidlik kitabçasını təqdim edərkən onu da dedilər ki, Vüsal Musayev üzərinə düşən bütün tapşırıqları layiqincə yerinə yetirdi. Buna görə dəfələrlə fəxri fərmanlara layiq görülüb, ailəsinə təşəkkür məktubları göndərmişik”.
…Nəzakət xanımın ürəyi dolu idi. O, Südabə ananın da kədər dolu oğul həsrətindən xeyli danışdı. Danışdıqca kövrəldi.
Kəndəbil şəhidlərinin ən kiçiyi, Musayevlər ailəsinin sonbeşiyi Vüsal cəmi 7 ay əsgəri xidmətdə oldu. Xidməti borcunu yerinə yetirərkən 1998-ci ilin 10 mayında 20 yaşına 20 gün qalmış Qarabağda – Füzuli rayonunun Alxanlı kəndində şəhid oldu. Allah rəhmət eləsin! Vətən sağ olsun!
TƏRLAN ABDULLAYEVA, “ƏKİNÇİ”NİN MÜXBİRİ
Terlan xanım sene ailemiz adından teşekkürlüyümüzü bildirik senin bu işde zehmetin olduğu üçün sene çox sağ ol deyirik.Qoy bu haqqında yazdığınız şehid sonuncu şehidimiz olsun bu torpağımız birde şehid vermesin qelebe bizim olsun
Nəzakət xanım , mən də Sizə təşəkkür edirəm .Bu böyük itkiyə görə Allah ailənizə səbr versin .Vüsal qardaşımızın qəbri nurla dolsun . Onu böyüdən ananın qarşısında baş əyirəm .
Mən Vüsalla 11 il bir sinifdə oxumuşam hətta bir parta arxasında əyləşmişik.Vüsal çox mehriban, qayğıkeş , hər şeyə qarşı çox diqqətli bir oğlan idi. Vüsal şəhid olan ili mən tələbə idim. Kəndə gələndə bu xəbəri eşitdim və çox sarsıldım. Allah rəhmət eləsin, qəbri nurla dolsun.
Allah Vüsal qardaşımıza rəhmət etsin.Qəbri nurla dolsun.Yaxınlarına səbr,dözüm versin.Allah Südabə anaya saglıqlı,uzun ömürlər versin.AMİN.
Yenə həyacan dolu hisslər bizi kövrəltdi.Şəhidlərimizi xatırladıq onları düşündükcə ürəyimizdən nələr keçmədi? Şəhidlərimizi fikirləşəndə onların ürəklərində qalan,bitirib tamamlaya bilmədikləri arzuları,onlarla bağlı acı və qəmli xatirələr bizi kədər hopmuş niskilli misralar yazmağa məcbur edir.Sən ləyaqətlə yaşadın Vüsal qardaş,şərəflədə bu dünyadan köçdün.Vüsal qardaşımızın döyüş yolu haqqında məlumatlandım.Acı-acı bir-birindən ağır xatirələr bizi yenə də o günlərə qaytadı.Allah bütün Şəhidlərimizə rəhmət eləsin.
Hörmətli MƏHRUZƏ xanım , Sizi salamlayıram və mənim öyrəndiyimə görə Siz Vüsal Musayevin doğma bacısısınız.Əvvəla, bu böyük itkiyə görə Sizə və bütün ailənizə dərin hüznlə başsağlığı verirəm. Əslində Vüsal hər bir azərbaycanlı xanıma doğma qardaşı qədər əzizdir. Çünki VƏTƏN ən çətin günlərində məhz Vüsal kimi igidlərin çiyinləri üzərində bərqərar olub. Allah bütün şəhidlərimizə rəhmət eləsin .Onlar bizim qürur yerimizdir.
doğurdan bu gənc şəhidin acınacaqlı taleyi meni çox sarsıtdı.Vüsal kimi neçə gənclərimiz torpaqlarimiz uğrunda gedən döyüşlərdə canlarını qurban vermişlər .allah cəmi şəhidlərmizə rəhmət eləsin .Ulu tanridan Vusal qardaşımıza rəhmət diləyir qəbiri nurla dolsun deyirəm .Mənzurə xanimasa səbir diləyirəm.Tərlan xanim sizə gəldikdə isə uzun ömür can saglığı arzulayıram.Çox sağolun ki,Vusal kimi gənc qəhraman şəhidlərimizi bizlərə tanıdırsınız.Yazan barmağlariniz var olsun.
Salam Aynurə xanım ! Çox gənc yaşda Vətən yolunda canını fəda edən Vüsal qardaşımıza həsr etdiyim bu yazımı oxuduğunuza görə Sizə minnətdaram . Allah bütün Azərbaycan şəhidlərinə rəhmət etsin.VƏTƏN SAĞ OLSUN!
Terlan xanim size derin tewekkurumu bildirirem veten ugrunda wehit olanlar unudulmaz
Mən də Sizlərə öz dərin minnətdarlığımı bildirirəm ki , hələ çox gənc ikən şəhidlik məqamına yetişən Vüsal qardaşımızla bağlı harırladığım bu məqaləni zəhmət çəkib oxuyaraq öz gözəl duyğularınızı mənimlə də bölüşdünüz .
Allah bütün şəhidlərə rəhmət eləsin!
AMİN ! BİZ HAMIMIZ AZƏRBAYCAN NAMİNƏ CANINI FƏDA EDƏN ŞƏHİDLƏRİMİZİN RUHU QARŞISINDA BORCLUYUQ.
Comments are closed.