“Bank-kredit məsələləri – regional KİV-lər və ictimaiyyət”

Lənkəran şəhərində “Bank-kredit məsələləri – regional KİV-lər və ictimaiyyət” mövzusunda “dəyirmi masa” keçirilmişdir. Tədbir Zərdabi Mətbuat Mərkəzinin və “KredAqro” Bank Olmayan Kredit Təşkilatının (BOKT) birgə həyata keçirdikləri “Azərbaycanın paytaxtında və bölgələrində bank-kredit məsələləri və KİV: mövcud durum, peşəkarlığın artırılması və təcrübə mübadiləsi” layihəsi çərçivəsində baş tutmuşdur. “Dəyirmi masa”da Zərdabi Mətbuat Mərkəzinin sədri, Azərbaycan Mətbuat Şurasının icraçı katibi Rəhim Hüseynzadə rəhbərlik etdiyi mərkəz haqqında məlumat vermişdir. Bildirmişdir ki, təşkilat indiyədək iyirmiyə yaxın beynəlxalq və yerli layihəni həyata keçirmişdir. Qeyd olunmuşdur ki, jurnalist təşkilatı 2012-ci ildən başlayaraq “KredoAqro” BOKT ilə birgə layihələr həyata keçirir. Doqquz ayı əhatə edən ilk layihə çərçivəsində Bakı şəhərində “dəyirmi masa”lar, görüşlər təşkil edilmiş, monitorinqlərin nəticələri açıqlanmışdır. Lənkərandakı “dəyirmi masa”nın regionlarda reallaşdırılan ikinci tədbir olduğunu deyən Rəhim Hüseynzadə ilk tədbirin Şəkidə keçirildiyini diqqətə çatdırmışdır.
“KredoAqro” BOKT-nin departament rəhbəri Zaur Əliyev təmsil etdiyi təşkilatın fəaliyyət dairəsi və qazandığı uğurlardan danışmışdır. Bildirmişdir ki, təşkilat “Consultinq Business” işgüzar jurnalı tərəfindən 2012-ci ilin “Bank olmayan kredit təşkilatı” nominasiyasının qalibi kimi “İlin şirkəti” mükafatına layiq görülmüşdür. Bu dəyərləndirmədə təşkilatın media ilə əlaqələrinin nə dərəcədə qurulması da nəzərə alınmışdır. “Dəyirmi masa”da KİV-lərin və bank-kredit təşkilatlarının təmsilçiləri qarşılıqlı əməkdaşlıqla bağlı rəy və təkliflərini bildirmişlər. Qeyd olunmuşdur ki, belə tədbirlərin bölgələrdə keçirilməsi həm media, həm də bank-kredit sahəsi üçün böyük əhəmiyyətə malikdir.
Sonda jurnalistləri maraqlandıran suallar cavablandırılmışdır.