Xoş avazın, gözəl səsin var olsun, Nazim Həsənov – VİDEO

… Ruhumuzu oxşayan, duyğularımıza sığal çəkən saf bir musiqi dinləyəndə qəlbimizdə  ən gözəl arzular baş qaldırır. Adama elə gəlir ki, dünya ancaq sülh istəyində, insanlar isə həqiqət sorağındadır. Bir mahnıda deyildiyi kimi: “Hər bir kəsi öz donunda görənləri min yaşasın” istəyi keyfiyyətcə daha əhəmiyyətli bir mərama çevrilir. Hər dəfə Nazim Həsənovu dinləyəndə “Səs Allahın istədiyi  bəndəsinə verdiyi nemətdir” fikrinin məhz Nazim Həsənova da aid olduğunu anlayıram.

Nazim  Həsənov 15.07.1963-cü ildə Zərdab rayonunda ziyalı bir ailədə anadan olub. Atası Sərkar müəllim  rayonun tanınmış, hörmətli insanlarından idi. Qardaşı Həsənağa Həsənov Ə. Əzimzadə adına Rəssamlıq məktəbini bitirdikdən sonra təhsilini davam etdirmək üçün Xarkovda Rəssamlıq İnstitutunun tətbiqi sənət və dekorasiya fakültəsinə daxil olmuş və buranı da uğurla bitirmişdir. Həsənağa Həsənov hazırda Bakıda yaşayır və işləyir.

İkinci qardaşı Azad Həsənov da rəssamlıq üzrə təhsil alıb və bu gün Zərdabda keçirilən kütləvi-mədəni tədbirlərin təşkilində  əlindən gələni əsirgəmir.

Nazim Həsənov şəhər 1 saylı orta məktəbini bitirdikdən sonra 1986-cı ildə indiki Azərbaycan Dövlət Mədəniyyət və İncəsənət Universitetinin kütləvi tamaşalar rejissorluğu fakültəsinin qiyabi şöbəsinə daxil olmuşdur. 1988-ci ildən Zərdab rayon mədəniyyət evində çalışır, burada fəaliyyət göstərən “Kür “ ansamblında solistlik edir. Hazırda Qoşaoba kənd mədəniyyət evində bədii rəhbərdir. Ailəlidir, iki ğözəl övladı var. Böyük oğlu Hikmət Sərkarzadə rayonda keçirilən “İstedadlar sorağında”  adlı müsabiqədə saz ifaçılığına görə qalib gəlmişdir.

Zərdab rayonunda keçirilən kütləvi mədəni tədbirlərdə, bayram şənliklərində iştirak edən hər kəs Nazim Həsənovun ifasını çox bəyənir, hər dəfə səhnəyə çıxanda müğənnini  alqışlarla qarşılayır. Çünki repertuarı zəngin və rəngarəngdir. Muğam, təsnif, xalq mahnıları və Azərbaycan bəstəkarlarının əsərlərini ustalıqla ifa edir. Zərdab tamaşaçıları Nazim Həsənovu çox sevir, onun ifasını dinləmək üçün səbirsizliklə gözləyirlər. Xoş avazı, ürəyə yatımlı səsi, yüksək səhnə mədəniyyəti müğənniyə çoxlu sayda pərəstişkar qazandıra bilib.

Nazim Həsənovu dinləyərkən tamaşaçılar müğənninin səsindən sanki mənəvi bir qida alır, Azərbaycan muğamının təsiri altında onlar da mənimlə eyni qənaətə gəlirlər – “Səs  Allahın istədiyi bəndəsinə verdiyi nemətdir”. Əlbəttə, bu tamaşaçılar tərəfindən sənətkara verilən yüksək qiymətdir. Belə bir ehtiramı qazanan səsiniz var olsun, Nazim müəllim! Böyük Yaradan Sizi qorusun! Sizin kimi sənətkarlara xalqın ehtiyacı var. Sizə mədəniyyətin bu cür təbliğində  uğurlar arzulayırıq. Bir də qarşıdan gələn  50 illik yubileyiniz münasibəti ilə  Sizi təbrik edir və can sağlığı diləyirik. Allah Sizi ailənizin üstündən əskik etməsin!

TƏRLAN ABDULLAYEVA, “Əkinçi”nin müxbiri.

http://www.youtube.com/watch?v=c202U88NvAo